榕榕小語

2006年8月14日

寫這篇Blog的時候心情是有啲驚, 15/16, 唔知想點,估計今晚都唔駛旨意訓得著.事緣 是明天要在耳朵做一個小手術, 講到要割自己啲肉或多或少會諗多少少, 將這篇日誌今日post 係唔想比人知我驚, 亦都唔想有人為我擔心, 因為 人前人後我嘅答案都係好小事, 聽日 待一切安好我會公告天下｡

2006年8月15日

我以為噚晚會失眠, 點知都瞓到, 埋單總共係瞓咗四個幾鐘, 手術時間10點30分,  8點30分起床, 時間應該啱到不得了, 但無奈 原來我記錯手術時間, 點解會咁架????? 發現嘅時候已經9點40分, 我仲懶個悠閒咁響度慢慢執嘢, 當我執到張醫院預約咭時先知出事, 手術時間原來係 9點30分, 好似拍戲咁 個電話同時響起, 係醫院打嚟, 我話記錯時間, 個護士姐姐話: “為著唔妨礙醫生及手術室安排, 要求我改約時間”, 我好亂, 明明做好心理準備今日開刀架嗎……, 於是……

我小小大話咁同佢講: “我已經揸緊車 嚟緊好快到” 護士姐姐惟有叫我 “盡快”.

唉 從來都覺得自己係小事糊塗 大事精明, 但近期一忙起上嚟 就會有啲神經質, 啲嘢亂哂籠, 一切完全錯配. 我好信邪 呢個朝早只係悲慘一日的開始｡

為咗快 車都冇揸, 搭的士碌去醫院, 途中個司機不停咁同我講嘢, 唔知佢物事, 佢兜錯路, 因為 太太太趕, 我惟有落車行咗兩個街口, 跑咗4層樓梯先至去到個counter 報到, 對於一個未食早餐將要做手術嘅人嚟講係唔係激咗啲? 一輪手續加等咗一陣, 響我有心情開始諗 開始驚嘅時候, 護士通知我要入手術室…..｡

當瞓響手術床上, 眼光光望住個天花 同啲燈光, 聽到醫生同護士討論手術過程安排,最鏗鏘有力的是手術用具互相碰撞所發出的聲響, 我腦裏面出現了Bobby 當日做手術的情景, 我想喊 原來個感覺係咁差嘅｡

手術開始 最痛就係打入耳背果兩枝麻醉針, 我惟有用力“鍊”住張被｡個護士姐姐可能知我驚, 有一句冇一句咁 “撩”我傾計, 又問我有冇人陪我嚟｡現場有幾個醫生旁聽, 成個手術進度過程都我都一清二楚, 但有時有啲嘢係唔清唔楚會好啲, 手術個幾鐘, 好似過咗幾年咁, 手術完成, 觀察期間 醫生將割出來的東西給我看, 我用個背脊”得”住佢 咪埋眼唔睇, 其他醫生好明白咁笑咗｡ 

 

 

坦白講原來我諗住神不知 鬼不覺咁唔比人知, 但原來係唔得嘅, 啲麻醉藥真係强, 雖然話係局部, 但係有啲暈暈地, 醜婦終需見家翁, 當我打比細佬叫佢嚟車我嘅時候, 嚇咗佢一跳, 唔知佢係唔係極速飄移, 佢用咗8分鐘就嚟到醫院, 見到佢 個心踏實咗, 但當佢話比我知之前係同姑姐一齊響公司出嚟, 唉 比姑姐知道 咁我就知大鑊……! 

 

 

結果 個電話不停咁響, 三個鐘頭內我聽咗8個電話, 覆咗2個sms, 個手術過程我重覆講咗8次, 其中有啲仲要我安慰返佢, 好攰 好眼瞓, oh give me a break, pls! 我聽日仲要晨雞咁早起床返工呀! 小病是福 放過我啦!

麻醉藥力散去, 痛醒咗, 寫吓Blog 希望可以分散注意力, 現在 Blog又寫完可以做啲物??? 以上就係本人今日 “錯亂一天”的經歷, 就係因為我失憶令到成日亂哂籠的結局｡

p.s. 各位親密戰友 至愛親朋 姊妹兄弟 死黨, 養傷期間 謝絶探訪, 望請見諒! 多謝關心!